“De bèlt um ins”: abia as ist gòngen der convegno

PALÙ DEL FERSINA. Der internazional convegno “De bèlt um ins”, gahòltet en Palai va de 10 finz as de 12 van schanmikeal, ist gaben an bichtegen moment ver za verglaichen se asn tema van taitschn sprochminderhaitn. Vil de relatorn inngalont, de mearestn van Balschlònt, Osterraich ont Taitschlònt: de hom klòfft va bos meing tea' ver za stitzn de sprochminderhaitn haitzegento. Der convegno ist kemmen organisiart van Bersntoler Kulturinstitut, pet de unterstitz va de Europeische Union. Der trèff ist gaben a toal van projekt van PNRR gahoasn “De kròft va de sprochminderhait: s bider augea' van a taitsches dorf en sud van Alpn”.

Oa'n van temen vourstellt ist gaben der sèll van digitalet verpesser ont naia tecknologi. S bersntolerisch aa ist en de mitt van doi verpesser: vil sòchen sai' kemmen schoa' gatu', òndera sai' nou za tea'. En de jarder as kemmen, s ist runt bichte za stitzn naia digitaletn strumentn, bavai de sai' vil praucht van junga. Ver za tea' dòs, s ist bichte za hom guata naia ideen, ont en de glaiche zait s ist bichte za klaum au vil datn, pet untersuachen ont interviste. Dòs bavai de tecknologischen strumentn va haitzegento hom de noat va vil datn, ver za meing òrbetn zan peistn. Ver za stitzn s doi auklaum va datn, de innrichtn hom schoa' ausgem unterstitzn, ont hom schoa' ausgarotn naiòrbetn: hoff ber iaz as s glaiche kimmp gamòcht ver de sprochen minder kennt abia s bersntolerisch.

De lokaln sprochen miasn hom de sai'na digitaletn strumentn, abia de app vern telefonidl oder de internetsaitn, ver za meing bern ont gea' envire en de jarder as kemmen. Oa'na van sòchen za verpessern iaz ver de sprochen minder kennt, zan baispil, ist de automatisch ibersetz. An òndern rif ist za prauchen de lokaln sprochen en de social, abia Tik Tok oder Instagram. Van convegno s ist kemmen aus runt de idea va mearsprocheket: s ist bichte za prauchen s balsch as de socialmedia abia Facebook oder Instagram, ober s ist bichte za prauchen de sai' lokal sproch aa. A sproch minder kennt abia s bersntolerisch ist a pahalter ver òlla de lait as lem en de inger Provinz, ont alura s ist a guata sòch za lòng sa kennen as de social aa. De òndern temen vourstellt van relatorn sai' gaben: schual ont didaktischn strumentn; verpesser van musealnsitzn; gschicht van sprochen minder kennt.

Trèffen abia der doi sai' bichte aa ver za verglaichen se zbischn taitscha sprochen minder kennt. Pet de zòmmòrbet kemmen aus naia ideen ont naia strumentn, bichte ver za stitzn de sprochen. Der convegno ist kemmen aroganommen ont s ist moglech za schaung en as de internetsaitn, abia de sèll Youtube van Bersntoler Kulturinstitut.

Riassunto dell'articolo in lingua italiana:

Si è svolto nelle giornate dal 10 al 12 ottobre il convegno internazionale “De bèlt um ins - Il mòcheno e altre lingue germaniche: strategie e prospettive”. Organizzato a Palù del Fersina, ha visto la partecipazione di 28 relatori, provenienti perlopiù da Italia, Austria e Germania. Molti gli impulsi ricevuti dalle relazioni, in particolare in merito all'insegnamento e all'apprendimento delle lingue di minoranza attraverso strumenti innovativi e digitali. Il futuro delle lingue locali si deciderà anche attraverso il loro utilizzo sulle piattaforme digitali, sempre in un'ottica di plurilinguismo, dove accanto alla lingua di maggior uso si valorizzi anche la propria lingua di minoranza.